יעצט איז: מיטוואך אוגוסט 16, 2017 3:13 pm


Welcome to דער קרעטשמע גאסט! רעגיסטריר  Or performs the  אריינסיינען

מעלדונג:

מיינע געדאנקען איבער דעם כינוס הרבבות

השקפה ענינים, און דעבאטעס ארום זיי

מיינע געדאנקען איבער דעם כינוס הרבבות

הודעהדורך בוקי בן יגלי » דאנערשטאג יוני 08, 2017 3:52 am

איך האב אן ערנסטן ספק צו מיינע שורות געהערן דא אדער אינעם עולם התורה והחסידות, איך וואלט עס אפשר געשטעלט אין ביידע, אבער איך מיין אז דערווייל וועל איך עס לייגן דא:

בס"ד

מיינע געדאנקען איבער דעם כינוס הרבבות

איך גיי פרובירן זיך צו האלטן קורץ. איך האב זיך זייער גע'ישוב'ט יא צו שרייבן אדער נישט צו שרייבן. אבער איך האב מחליט געווען יא צו שרייבן און עס ארויפשטעלן דוקא דא, אין קרעטשמע'תינו, ווער עס קומט דא אהער זאל עס זעהן און ווער נישט איז נישט. איך האב געטון מיינס. העכסטנס אויב איינער וויל, איך גיב רשות עס צו פירן ווייטער, ק\פ'ען און וואטעווער. מען מוז מיר ניטאמאל געבן קרעדיט.

ובכן, אין די טעג קערט זיך איבער די שטאט, הימל און ערד און דער כינוס הרבבות (רבבות מיינט לפחות צוואנציג טויזענט אידן, כאטש איך גלייב נישט עס גייט זיין דארט אפילו צען טויזענט, אבער וואסא נפק"מ...) צו דער גייט, צו יענער גייט, ליטווישע ראשי ישיבה יא אדער נישט, קעגן שטיינמאן אדער פאר אויערבאך. יא ארונים נישט ארונים. בקיצור ס'לעבט זיך און מען האט פון וואס צו רעדן.

ובכן, איך קום פון א שטארק קנאי'שע בעקגראונד, אנטי ציונות ליגט ביי מיר אין די בלוט און אין די ביינער, נישט נאר פון געבורט אן, נאר שוין פון כמה וכמה דורות ארויף. און טאקע דערפאר האט עס מיך אזוי פאראינטערעסירט און דאס איז געווען וואס האט מיך סוכ"ס געברענגט צו שרייבן די דאזיגע שורות.

ובכן, איך בין שוין היינט גענוג אלט און געזעהן גענוג אז באמת גלייב איך נישט מער קיינעם. איך גלייב נישט אז די גזירה איז ממש אזוי שלעכט ווי די מאכן עס, און די זעלבע צייט גלייב איך אויך נישט די וואס שרייען אז די אנדערע האבן זיך סתם אזוי אנגעדראפעט אויף די גראדע ווענט און עס איז לגמרי נישט דא קיין שום פראבלעם און אלעס איז אזוי ווי עס איז אלעמאל געווען.

כאטש עס קען זייער מעגליך זיין אז איינער פון די צוויי איז יא גערעכט. אבער ביידע האבן שוין אזויפיל ליגנט געזאגט אז איך גלייב זיי מער קיינער נישט. פון מיין זייט קען זיין אז די גאנצע מעשה איז א בלאף און עס איז בס"ה א פרואוו פון געוויסע עלעמענטן צו באקומען אויפמערקזאמקייט און עס קען פונקט אזוי זיין אז די מדינה וויל בשתיקה פארכאפן אלע ישיבה בחורים אין מיליטער זיי אפצופירן פון וועג וגו' וכו'.

הכל מודים...

פיין, שוין אזויפיל גערעדט. נו וואס וויל איך? איז אזוי. צווישן די גאנצע גע'טענה'ריי, זעה איך איין זאך אויף וואס יעדער איז מודה. אז פאר די בחורים וועלכע זענען פאקטיש נישט אין ישיבה, נאר זיי דרייען זיך אויף די גאסן און טוען גארנישט נוצליך מיט זייער צייט, פאר די בחורים האט מען אנגעהויבן שווער מאכן דאס דרייען זיך אויף די גאסן. די בחורים האט מען אנגעהויבן אפיר זוכן און מען נעמט זיי אין מיליטער.

און דאס זעה איך איז מוסכם משתי הצדדים (אדער משלשתם אדער פון וויפיל צדדים עס איז נאר דא), דאס זעה איך איז יעדער איינער מודה. און טאקע אויף דעם וויל איך זיך אפשטעלן.

מיין החלטה צו שרייבן אט די שורות איז געקומען בשעת'ן לייענען דעם מכתב פון דעם סקולענ'ער רבי'ן שליט"א, אין וועלכען ער אנטשולדיגט זיך אז ער איז שוין צו אלט און שוואך צו טון עסקנות פאר דעם ענין, אבער ער שרייבט קלאר ארויס זיין דעת. און וואס שרייבט ער?

דער סקולענער רבי'ס בריוו

אט וואס דער סקולענער רבי שרייבט, בלשונו הק' ממש: "וחובה מוטלת עלינו לפעול ולהפעיל למען כבוד התורה וקיומה, ולהאבק על הצלת כל נפש מישראל, אפילו כאילו הנראים כנחשלים במחנה, כי כל א' מישראל עולם מלא הוא, ואין לנו שיור רק התורה הזאת, להתאמץ בכל עוז להעמיד בעבורם מוסדות תורה לפי מצבם ודרגתם, להצילם ולקרבם תחת כנפי השכינה, ולהכניסם לחדרי התורה והישיבות, ובזה להצילם בל ירדו באר שחת, ולא יפלו ח"ו ברשת של מינות וכפירה הפרוסה לפניהם, ובל יפלו ח"ו במחנה צבאותם אשר באי' לא ישובון ח"ו..."

פון דעם בריוו זעהט מען זייער קלאר אז מען האט דעם סקולענער רבי'ן געזאגט אז די סכנה איז בעיקר אויף די שוואכע, וואס זיי פארכאפט מען רח"ל צום מיליטער. ווייל צו דעם באציעט ער זיך בעיקר אין זיין בריוו.

און אצינד פרעג איך א פראגע. וואס איז דער פראבלעם מיט דינען אין דעם איזראעלישן מיליטער?

דער פראבלעם

און דער תירוץ איז צוויי זאכן. איינס, וואס דאס ענטפערן רוב מענטשן תיכף, אז מען פירט זיי אראפ פון אידישן וועג. זיי זעען זיך אן ל"ע מיט וואס מען טאר נישט און זיי קענען נישט האלטן געהעריג אידישקייט, מען לערנט נישט, מען דאווענט נישט, וגו' וכו'. תמצית הדברים, עס איז א אידישקייט פראבלעם. דערנאך איז דא א צווייטע פראבלעם, וואס דאס הערט מען שוין פיל ווייניגער. און דאס איז, אז דאס עצם דינען אינעם ציוני'סטישן מיליטער איז כפירה אין דעם איינציגען באשעפער.

יעדער סאלדאט דארף שווערן געטריישאפט צו די מדינה און דא קומט מען אן צו אן ערנסטע פראבלעם, וואס מיט דעם בין איך אויפגעוואקסן און דאס ערווארט איך צו הערן בעיקר פון די אידן אין די קנאי'שע קרייזן.

דערווייל אבער, לא מיני' ולא מקצתי'. אין דעם גאנצן סומאטאכע האב איך נאך קיין איין ווארט נישט געהערט איבער דעם צווייטן ענין וואס איך האב ערווענט. מען רעדט נאר פון איין זאך: אידישקייט. די מדינה וויל אפפירן דעם גאנצן יהדות החרדית פון דעם ערליכן וועג און דאס גייט מען טון דורכ'ן מיליטער.

איך האב דא נעבן מיר דעם בראשור וואס מען האט אויסגעלייגט אין די בתי מדרשים און איך זאג אייך דעם אמת אז איך האב נישט אדורכגעליינט דעם גאנצן מעשה אבער איך האב עס גאנץ ערנסט דורכגעבליקט און איך האב נישט געזעהן קיין איין מאל אפילו דערמאנען דעם ענין פון כפירה במלכות שמים דורך דעם עצם דינען אין מיליטער.

די איינציגסטע זאך וואס מען ברענגט אויף און מען רעדט ארום איין מאל און נאכאמאל איז "אידישקייט".

וכאן הבן שואל.

המבלי אין קברים במצרים? האט מען שוין געענדיגט מיט אונזער ניו יארק אז מען קען זיך שוין ספראווען מיט די ארץ ישראל'דיגע בחורים פון די גאסן?

איך לעב נישט אין קעניע, אויך נישט אויף עפעס א פארשטופטן אינזל אינעם ווייטן פאסיפיק און אפילו נישט אין קעלעמעזאא. איך לעב דא אינעם היימישן, אידישן, חסיד'ישן ניו יארק. איך דריי זיך גענוג אין אונזער סביבה צו וויסן אביסל וואס טוט זיך, בפרט אז איך בין אביסל אויך עוסק בצרכי ציבור.

עס הערשט א מגיפה אין אונזערע גאסן. יא, א מגיפה במלוא מובן המילה. הונדערטער, און אפשר גאר טויזענטער בחורים דרייען זיך ארום אויף די גאסן. טייל האבן יא א דזשאב און טייל נישט, אבער הצד השוה שבהם איז, אז אונזער חינוך סיסטעם האט זיי אויסגעשפיגן און מען האט זיי געלאזט בלי משען ומשענה. אן קיין שום מסגרת און אן קיין שום סביבה.

דער אייזערנעם פארהאנג

מען האט אויפגעשטעלט אן אייזערנעם פארהאנג ארום אונזערע ישיבות און עס זענען דא אזעלכע וועלכע בלייבן אונטערן פארהאנג און קענען נישט אריינקומען. זיי האבן אראנדזש דזשוס אין זייער אדערן, נישט קיין בלוט.

איך ווייס אז יעצט גייט מען שרייען אז זיי באלאנגען נישט אין ישיבה. פון ווי ווייס איך אז מען גייט עס שרייען? ווייל איך האב אליינס געטון פאר טייל פון די בחורים און איך האב עס אליינס געהערט פון מנהלים וראשי ישיבה.

ובכן קום איך אייך ענטפערן. עס איז שקר וכזב!!!

לייענט אפ דעם בריוו פון דעם סקולענער רבי ווי ער שרייבט קלאר אז מען דארף זיך שטארקן מיט דעם גאנצן שטארקקייט אויפצושטעלן מוסדות פאר זיי.

יא, טייערער ראש ישיבה און מנהל. קומט מיר נישט זאגן עס איז נישט אונזער אחריות. עס איז יא אייער אחריות.

איך ווייס אז יעצט גייט מען נעמען דעם בריוו פון סקולענער רבי און נוצן אלס פראפאגאנדע פאר דעם כינוס און מען גייט לגמרי איגנארירען די פייערדיגע ווערטער וועלכע ער שרייבט בדם לבבו.

זאג נאר טייערער רב, רבי, ראש ישיבה, מנהל אדער מחנך. ווען איך רעד מיט דיר איבער דעם נושא און דו זאגסט מיר, נו, וואס קען מען טון, האסט עפעס אן עצה? מיינסטו אוודאי אז יעצט ביסטו געבליבן גערעכט ווייל איך גיב דיר נישט קיין עצה. אבער דער אמת איז אז דו ביסט נישט גערעכט. סקולענער רבי זאגט אזוי. ער זאגט אז מען דארף אויפשטעלן מוסדות פאר זיי: להכניסם לחדרי התורה והישיבות.

אויב האסטו נישט קיין עצה, דארף מען זיך אראפזעצן מטכס עצה זיין. אויב ווילט איר זיין א טייל פון דעם עולם התורה דארפט איר דאס טון. יא, איר זענט מחויב. ווייל אויב נישט וועט איר איין טאג אפגעבן דין וחשבון אויף דעם און איר וועט נישט קענען זאגן ידינו לא שפכו את הדם הזה ועינינו לא ראו.

לאמיך פארשטיין, נאר ווען סקולענער רבי הייסט גיין צו א כינוס אדער לייגן א פילטער אויפן טעלעפאן דעמאלס דארף מען אים פאלגען, און ווען ער הייסט אז מען דארף די בחורים מקרב זיין און מכניס זיין תחת כנפי השכינה דעמאלס דארף מען אים נישט פאלגן?

נאר דער ארבייטער און בעה"ב דארף אים פאלגן און דער רב, ראש ישיבה און מנהל דארף נישט? איך פרוביר צו פארשטיין.

אמאל בין איך געגאנגען אין פינסטערע גאסן...

קומט מיט מיר אמאל אויף א שפאציר אויף די טונקעלע גאסן פון דעם אידישן ניו יארק, מדי לילה בלילה, און גיבט א קוק אויף די פינסטערע פנים'ער מיט אויסגעלאשענע אויגן פון די בני (און ליידער בנות) ציון היקרים המסולאים בפז. איידעלע געזיכטער פון הייליגע נשמות, קינדער פון ערליכע אידישע עלטערן, אינגע קינדערלעך פון פערצן און פופצן יאר אלט וועלכע געפונען זיך אונטער דעם אייזערנעם פארהאנג, אויסגעשלאסן פון דעם עולם הישיבות, פון דעם ביסעלע וואס איז נאך געבליבן פון אידישקייט פאר אונזערע קינדער און די צוקונפטיגע דורות.

קינדערלעך וועלכע האבן נאך קוים געהאט די צייט עפעס צו זינדיגן. מען האט זיי געשיקט אין די מוסדות התורה אז די מחנכים זאלן עפעס אריינלייגן אין זיי. דערווייל האט מען זיי ארויסגערוקט אונטער דעם אייזערנעם פארהאנג קוים אביסל נאך די בר מצוה. די טייערע נשמות האט מען אויסגעשלאסן פון דארט און מיט א מאך מיט הענט און א קנייטש מיט דעם נאז האט מען עס אפגע'פטר'ט. "נעהה, ער באלאנגט נישט אין א ישיבה". פערטיג, אפגע'פסק'נט, באפם הרגו איש און מען שפירט זיך גוט.

טייערע אידן, צו ווייסט איר ווי די בחורים קומען אן? איר האט זיך אמאל אינטערעסירט? איינער האט אייך פארציילט? אויב נישט קומט אהער, איך וועל אייך זאגן, די בחורים אליינס האבן עס מיר פארציילט.

די נייע מגיפה

זיי קומען אן צו נוצן דראגס. יא, אזויווי איר הערט. עס איז אייך אפשר שווער צו גלייבן ווייל איך געדענק נאך אויך א תקופה ווען דראגס איז געווען עפעס וואס מען האט געהערט רעדן פון דעם אז ביי די שחורים איז דא אזא זאך, אבער ביי 'אונז' איז דאס נישט פארהאן.

טייערע אידן, די צייטן זענען פאראיבער. הונדערטער היימישע בחורים'לעך און מיידלעך באנוצען זיך מיט דראגס. און גאר גאר פילע פון זיי טוען זיך אווערדאוזן און פארלירן ל"ע זייערע לעבנס. אבער גלייבט מיר אז די זענען שוין די גליקליכע, אויף א בחינה ווי דער נביא קלאגט שוין: "טובים היו חללי חרב מחללי רעב". ווייל די וואס בלייבן לעבן האבן נעבעך דאס גיהנם אויף די וועלט.

איך האב אליינס מיטגעהאלטן לעצטענס מער ווי איין פאל וואס גאר ערנסטע רבנים און מומחים אין די געביטן האבן אפגעשיקט היימישע קינדער אויף לענגערע טערמינען צו ריהעב צענטערן פאר די פראבלעמען, טראץ וואס די ערטער זענען נישט געווען קיין פרומע מקומות און זיי וועלן נישט האבן דארט קיין זיק פון אידישקייט, ניטאמאל כשר'ס צו עסן, און מען האט ערנסט דן געווען דעם פראבלעם אז עס איז זייער מעגליך אז זיי גייען ארויסקומען פון דארט אן קיין זכר פון זייער אידישקייט.

מיט דעם אלעם האבן די רבנים גע'פסק'נט אז מען 'מוז' זיי אפשיקן אהין. ווייל צו בלייבן אזוי ווי זיי זענען געווען "איז נאך פיל ערגער". איר הערט? צו לעבן אזא לעבן איז ערגער ווי זיין א גוי. זיין א פלעינער גוי איז שוין גוט.

איז אויב ווי איך פארשלאגן א עצה, א געדאנק.

איך האב יא אן עצה

איך האב געזאגט פריער אז איך האב נישט קיין עצה, אבער אצינד וויל איך יא פארשלאגן אן עצה. איך וויל אראפפארן מיט א משלחת פון עסקנים צו די אנפירער פון די איזראעלישע מיליטער און זיי אראפלייגן דעם מצב אין די ניו יארקער גאסן און בעטן פראטעקציע ביי זיי אז זיי זאלן אראפקומען דא קיין ניו יארק און אויפשטעלן א לשכת הגיוס. זיי זאלן נעמען די אלע בחורים וועלכע דרייען זיך דא אין די גאסן און שטייען ל"ע בסכנה יעדן טאג אנצוקומען במעמקי השאול תחתיה (אויב זיי זענען נאך נישט דארט חלילה) און זיי מאביליזירן צו די ארמיי.

דער סקולענער רבי שרייבט אז מען דארף אויפשטעלן פאר זיי מוסדות. דאס מיינט אז אפילו אויב איז נישט מעגליך צו טרעפן א מהלך זיי משלב צו זיין אין די עקזיסטירנדע מוסדות, דארף מען אויפשטעלן פרישע, אבער דאס ווערט דאך נישט געטון, און צו זיין אביסל אמת'דיג מיט זיך, גלייב איך נישט אז דאס גייט אמאל געטון ווערן.

אויב אזוי קלער איך באמת, אפשר ליגט גאר אויף מיר א חיוב צו טון עפעס צו ראטעווען די בחורים. בפרט אז דער גאנצער פראבלעם פון כפירה ומינות האט מען דאך שוין לאנג פארגעסן און מען איז זיך נאר מתמקד אין דעם פראבלעם פון אידישקייט. נו, מיט די בחורים זיך דרייען אין די גאסן דא וועלן זיי זיכער ענדיגן פיל ערגער ווי דורכ'ן גיין אין מיליטער.

און איך האב נייעס פאר אייך. איך קען אזעלכע וועלכע קומען שוין פון דארט. איך קען אזעלכע וועלכע האבן געדינט דארט און זיי האבן זיך גאנץ היפש אויסגעמענטשלט. טייל פון זיי זענען אפילו געבליבן, אדער צוריק געווארן ערליכע פרומע אידן.

עס איז דא פיל מער שאנס אז זיי זאלן זיין נארמאלע מענטשן און אפילו פרומע אידן, נאכ'ן דינען אין דעם איזראעלישן מיליטער, ווי נאכ'ן זיך דרייען אין די ניו יארק'ער גאסן פאר עטליכע יאר.

צום שלוס

אמת, איך ווייס אז עס זענען טאקע פארהאן אזעלכע וועלכע באלאנגען באמת נישט אין ישיבה, עס זענען פארהאן אזעלכע מיט וועמען מען קען ליידער גארנישט טון. אמת. אבער מען נוצט די פאר געציילטע אלס א האלסעיל היתר זיך אפצו'פטר'ן אויף די הונדערטער אנדערע וועלכע באלאנגען דוקא יא אין ישיבה, און מיט אביסל מער אויפמערקזאמקייט און זיך אפגעבן מיט זיי וואלטן זיי אויסגעוואקסן שיינע ביימער בגן ה'.

דערווייל דרייען זיי זיך אן קיין שום מסגרת ביז דער מלאך המות אליינס ווערט זייער מסגרת רח"ל. איך האב עס אליינס מיטגעהאלטן ווי בחורים וועלכע זענען שוין געווען אין ישיבה זענען ארויסגעווארפן געווארן פאר קלייניגקייטן, און מיט אביסל מער אנשטרענגונג וואלט מען זיי געקענט ארויסהעלפן, אבער די ישיבות האב דאס נישט געטון.

אמת, זיי האבן גע'טענה'ט אז זיי האבן נישט קיין ברירה. נו, קען זיין זיי האבן טאקע נישט, איך בין דאך נישט דארט אינעווייניג, און איך בין אוודאי נישט דער באשעפער דן צו זיין צו זיי האבן טאקע נישט געהאט צו זיי האבן פשוט נישט גענוג געוואלט.

אבער דער סוף פסוק איז אז די בחורים כרגע זענען אויפן וועג אראפ צו די ערגסטע אפגרונדן אויף דעם וועלט, און זיי טראגן קיין ארץ ישראל צו דינען אין דעם איזראעלישן ארמיי קען זיין א געוואלדיגע הצלה פאר זיי. אמת, קען זיין אז טאקע נאר א הצלה פורתא, אבער וואס קען מען טון. מען האט דאך נישט קיין ברירה.

נו שוין, איך האב שוין גערעדט פיל לענגער ווי איך האב געוואלט. איך בין געווארן אביסל עמאציאנעל און איך האב זיך אביסל אויסגעגעבן. איך וויל נאר ענדיגן מיט א וויי-געשריי, א וויי-געשריי פון טיפן הארצן:

"מי לה' אלי"???!!!

ווער וויל זיך צושטעלן צו מיר און קומען צוזאמען קיין ארץ ישראל שתד'לען ביי די דארטיגע אינסטאנצן זיי זאלן קומען אהער ראטעווען אונזערע קינדערלעך מרדת שחת?
בוקי בן יגלי
 
הודעות: 13
הצטרף: דינסטאג אוגוסט 23, 2016 12:11 pm
האט שוין געדאנקט: 5 מאל
איז שוין געווארן באדאנקט: 30 מאל

Re: מיינע געדאנקען איבער דעם כינוס הרבבות

הודעהדורך בוקי בן יגלי » דאנערשטאג יוני 08, 2017 12:10 pm

נו שוין. זעהט אויס אז דער עולם איז אינגאנצן נישט אנטציקט פון מיינע געדאנקען...
בוקי בן יגלי
 
הודעות: 13
הצטרף: דינסטאג אוגוסט 23, 2016 12:11 pm
האט שוין געדאנקט: 5 מאל
איז שוין געווארן באדאנקט: 30 מאל

Re: מיינע געדאנקען איבער דעם כינוס הרבבות

הודעהדורך יאהאן » דאנערשטאג יוני 08, 2017 12:17 pm

גאר גאר שטארק געזאגט און פיין געשריבן, ביז... דיין עצה. דאס איז שוין "אנעקסעפטעבל" דאס אז די בראשור שרייבט גארנישט וועגן דינען און שווערן פאר א מרידה בה' גיבט עס נאכנישט קיין לעגעטימאציע, עס בלייבט ווייטער א מרידה בה', און ח"ו אז א אידיש נפש זאל האבן שייכות מיט דעם און כ"ש נישט שווערן טריישאפט.

אלנפאלס, דיין פונקט פון עניי עירך קודמין ווי די מצב פון די נושרים דא איז איז א וואליד און ווייטאגליך.

---

אפפס... ווואסטע געזאגט???
די לייק קנעפל איז אויבן ביי די לינקע זייט... יא יא, נאך אביסל ארויפציר... יאפ! דאס איז עס! נו גיב א דריק...
ניק אוואטאר
יאהאן
עמוד ה'קרעטשמע
 
הודעות: 1102
הצטרף: מאנטאג יוני 06, 2016 7:53 pm
האט שוין געדאנקט: 82 מאל
איז שוין געווארן באדאנקט: 203 מאל

Re: מיינע געדאנקען איבער דעם כינוס הרבבות

הודעהדורך האסטו געהערט אזאנס? » דאנערשטאג יוני 08, 2017 12:17 pm

בן יגלי, דו זאגסט א נקודה, אבער עס מיינט נישט אז ווילאנג מיר זענען נישט מסודר דארף מען אויך נישט קעמפן פאר זייערע אינטערעסן.

מען טוט נישט פאר די ניו יארקער בחורים? נו, כאטש לאמיר טון פאר אנדערע אידישע קינדער!!!
א חוצפה און א עזות!
האסטו מיר געהערט אזאנס???
ניק אוואטאר
האסטו געהערט אזאנס?
חבר ה'קרעטשמע
 
הודעות: 56
הצטרף: דאנערשטאג נאוועמבער 03, 2016 2:37 pm
האט שוין געדאנקט: 68 מאל
איז שוין געווארן באדאנקט: 44 מאל

Re: מיינע געדאנקען איבער דעם כינוס הרבבות

הודעהדורך בולעטין » דאנערשטאג יוני 08, 2017 3:21 pm

די ארטיקל איז שיין צולייגט
אבער איר תוכן איז פאלש
איך ארבעט ביי א ארט ווי יומם ולילה טוט מען סיי דורך געצאלטע מענטשן און דורך עסקנים טאג און נאכט צו העלפן בחורים
אין כאן גזירת בחורים
בולעטין
תושב ה'קרעטשמע
 
הודעות: 392
הצטרף: זונטאג סעפטעמבער 07, 2014 11:06 am
האט שוין געדאנקט: 61 מאל
איז שוין געווארן באדאנקט: 33 מאל

Re: מיינע געדאנקען איבער דעם כינוס הרבבות

הודעהדורך איבערלעבער » פרייטאג יוני 09, 2017 12:54 am

וואס דו שרייבסט איז ליידער זייער ריכטיג, און די עצה לויט די אומשטענדן איז דוקא א גוטע עצה.
איך בין גרייט דיר צו שטיין אין הילף.
ניק אוואטאר
איבערלעבער
תושב ה'קרעטשמע
 
הודעות: 286
הצטרף: זונטאג פעברואר 08, 2015 8:04 pm
האט שוין געדאנקט: 128 מאל
איז שוין געווארן באדאנקט: 69 מאל

Re: מיינע געדאנקען איבער דעם כינוס הרבבות

הודעהדורך מיין מיינונג » פרייטאג יוני 09, 2017 8:52 am

איך ווייס ב״ה נישט די מצב מיט די בחורים, אבער וואס איר שרייבט איז גאר שרעקעדיג און הארציג.

איך האב נישט געליינט די קונטרס צו וויסן צי זיי ברענגען טאקע נישט די פראבלעם פון מרידה במלכות שמים, אבער פון וואס איך האב אלס געהערט ביי סאטמארער דרשות וועגן דעם געדענק איך אז מען דערמאנט דאס אין אנפאנג, אז דאס אז די עצם מיליטער איז א מרידה במלכות שמים איז דאך אפגערעדט און דאס וואלט געווען אפילו די מיליטער וואלט יא געווען א כשר פלאץ, אבער חוץ מזה איז עס דאך א מקום טומאה וזוהמה א.א.וו.

איך פארשטיי אז איר האט געשריבן אייער׳ס צו ארויסברענגען די ווייטאגליכע פונקט, אבער אייער קשיא מיט וואס איר ברענגט עס ארויס איז לגמרי נישט שווער. דאס אויפשטעלן א סיסטעמאטישע פלאן וויאזוי צו פארכאפן יעדן בחור צום עומק פונעם תהום רבה איז פיל ערגער ווי דאס נאכלאזן בחורים וואס ״קענען״ אהין אנקומען.

אייער עצה, דאס איז דאך עצת הרב שטיינמאן, ניין?
דאס איז מיין מיינונג, און מיין מיינונג איז קיין מיינונג!
ניק אוואטאר
מיין מיינונג
עמוד ה'קרעטשמע
 
הודעות: 742
הצטרף: זונטאג אוגוסט 24, 2014 6:16 pm
האט שוין געדאנקט: 210 מאל
איז שוין געווארן באדאנקט: 131 מאל


צוריק צו היכל השקפה

ווער איז דא?

באנוצער אין דעם פארום: נישטא קיין איינגעשריבענע באנוצער און איין גאסט